Kreu i Kuvendit Gramoz Ruçi i ka dhënë një të shtyrë të re ish-ministrit të Brendshëm, Saimir Tahiri teksa ka pranuar se Shqipëria u mbyt në hashash në vitin 2016 dhe se policia e lejoi këtë gjë.
“Një nga gabimet është moszbatimi i misionit dhe detyrave nga organet ligjzbatuese për të kontrolluar territorin për kanabisin. Në çfarë mase, kjo është e diskutueshme, por që ka qenë aty ka qenë aty. Para të krimit ka pasur edhe në fushatat e tjera, ka pasur edhe në këtë fushatë dhe në këtë kendvështrim duhet të reflektojmë në kodin e ri që ta ndalojmë”, u shpreh ai.
Megjithatë në vijim të bisedës në Top Story të Sokol Ballës ai ka kërkuar që të pritet deri në përfundimin e hetimit në lidhje me Tahirin.
“Në raste të tilla, siç është çështja e zotit Tahiri, politika të heshtë derisa drejtësia të flasë. Ne duhet të mbajmë duart larg derisa drejtësia të shprehet për rastin konkret. Nuk bëj komente, qoftë nga pozicioni personal, as politik dhe aq më tepër si kryetar Kuvendit”, deklaroi Ruçi. Kryeparlamentari thotë se “nëse ministrit të brendshëm kjo gjë u doli nga kontrolli, atëherë ishte tepër vonë dhe çështja është që në 2017 masat që u morën ishin shumë të ashpra dhe kjo na nderon”.
Gramoz Ruci është zyrtari i parë i PS që pranon hapur se policia lejoi kanabisin në vend ndryhse nga kryeministri Rama që këmbëngul se policia bëri gjithcka për ta ndaluar atë. Shërbimi sekret shqiptar publikoi në mënyrë jozyratre në media këto ditë emrat e mbi 70 oficerëve të policisë të përfshirë në trafikune kanabisit.
