Kreu i Partisë Demokratike, Sali Berisha, ka deklaruar se sondazhet e fundit të brendshme të Partisë Socialiste tregojnë një rënie të ndjeshme të mbështetjes për forcën qeverisëse.
Në një deklaratë për mediat, Berisha tha se sipas këtyre sondazheve, PS ka zbritur në 29 për qind, ndërsa kryeministri Edi Rama renditet edhe më poshtë se vetë partia.
“Poll-et e fundit të bëra nga PS kanë një rënie katastrofale. Partia e krimit është rrokullisur në shifrat e saj në 29 për qind”, deklaroi Berisha.
Ai theksoi se këto të dhëna nuk janë publikuar nga opozita, por, sipas tij, bëhet fjalë për një sondazh të brendshëm të Partisë Socialiste.
“Ky nuk është një poll i bërë nga opozita, po ky është poll i brendshëm i vetë partisë së krimit. Edi Rama vetë qëndron nën partinë”, u shpreh Berisha.
Kreu i PD-së shtoi se, sipas tij, nëse në rezultatet e sondazhit do të merrej parasysh edhe ajo që e cilësoi si “koeficienti i frikës”, mbështetja për PS do të ishte edhe më e ulët.
Berisha e lidhi këtë situatë me shkërmoqjen dhe degradimin e qeverisë, duke theksuar se rënia në sondazhe ka shkaktuar alarm brenda Partisë Socialiste.
“Narkoshteti po shkërmoqet! Po degradon!”, deklaroi ai. a.b
