Deputeti i Partisë Demokratike, Belind Këlliçi, ka reaguar lidhur me akuzat që ai ka ngritur prej dy javësh ndaj kryeministrit Edi Rama, duke kërkuar reagim nga kreu i qeverisë dhe hetim nga SPAK.
Në një deklaratë të publikuar në rrjetet sociale, Këlliçi pretendon se një sërë operacionesh financiare, të lidhura sipas tij me kompaninë “GLG Investment” dhe një shtetas venezuelian me mbiemrin Marquez, kanë mundësuar rivlerësimin e një toke në Gjirin e Lalzit dhe më pas transferimin e një licence kazinoje në zonën e stadiumit “Air Albania”.
Sipas Këlliçit, toka e blerë për rreth 320 mijë euro në prill të vitit të kaluar është rivlerësuar dy muaj më vonë në 26 milionë euro. Ai pretendon se këto veprime janë kryer brenda një periudhe prej rreth pesë muajsh.
Këlliçi e lidh shtetasin venezuelian me Gert Hakën, të cilin e cilëson si mik të vjetër të Olsi Ramës. Ai pretendon gjithashtu se Haka ka shërbyer si personazh “prestanome” në këtë skemë.
“Prej 2 javësh, Edi Rama hesht, nuk bën asnjë shpjegim a transparencë për këtë akuzë të rëndë”, shkruan Këlliçi.
Deputeti i PD-së përmend edhe disa institucione shtetërore, përfshirë Agjencinë e Lojërave të Fatit, Drejtorinë e Pastrimit të Parave, Autoritetin e Konkurrencës, Hipotekën dhe strukturat e Krimit Ekonomik, duke pretenduar se operacionet janë kryer me “bekimin” e tyre.
Këlliçi ka kërkuar gjithashtu ndërhyrjen e SPAK, duke pretenduar se institucioni është informuar prej dy javësh për çështjen dhe se duhet të kishte nisur procedimin penal.
“Edhe sa duhet të presim që të ketë një reagim ndaj abuzimit më të madh që ndokush ka bërë me pushtetin në historinë tonë?!”, përfundon Këlliçi.
