Kreu i Partisë Demokratike, Sali Berisha, ka akuzuar televizionet kombëtare për pabarazi në kohën mediatike të dedikuar qeverisë dhe opozitës.
Në një deklaratë për mediat, Berisha tha se zyra e shtypit e PD-së ka monitoruar katër televizione kombëtare, RTSH, Top Channel, Klan dhe Vizion Plus, për një periudhë 30-ditore.
Sipas të dhënave të publikuara nga PD, këto media i kanë kushtuar kryeministrit Edi Rama dhe Partisë Socialiste gjithsej 15 orë, 10 minuta dhe 59 sekonda, ndërsa opozitës 4 orë, 46 minuta dhe 43 sekonda.
Berisha pretendon se kjo përbën një raport të pabarabartë në pasqyrimin mediatik dhe se, sipas parimit të “par condicio”, në një sistem demokratik pozita dhe opozita duhet të kenë kohë të barabartë mediatike.
Sipas tij, në llogaritjet e kohës që i atribuohet opozitës janë përfshirë edhe kronikat dhe raportimet për protestat 71-ditore kundër qeverisë.
Berisha solli si shembull datën 26 qershor, kur, sipas monitorimit të PD-së, opozitës iu kushtuan vetëm 1 minutë e 30 sekonda, ndërsa Partisë Socialiste 48 minuta e 45 sekonda.
“Pra, një raport 32.5 me 1”, deklaroi Berisha, duke e cilësuar këtë si “pabarazi ekstreme” në pasqyrimin mediatik.
Kreu i PD-së kritikoi edhe Autoritetin e Mediave Audiovizive (AMA), duke pretenduar se të dhënat e publikuara prej institucionit nuk pasqyrojnë realisht pabarazinë në hapësirën mediatike.
Berisha i akuzoi mediat e monitoruara se janë nën ndikimin e qeverisë dhe se përdoren për të sulmuar opozitën dhe drejtuesit e saj.
