Kryetarja socialiste e Bashkisë Dimal, Juliana Memaj, ka deklaruar se është kundër propozimit për bashkimin e Dimalit me Bashkinë Berat.
E ftuar në studion e emisionit “Ditari i Fundjavës” në A2 CNN, Memaj tha se Dimali sapo kishte fituar identitetin e tij si bashki dhe se qytetarët nuk patën mundësi ta gëzonin atë.
“Në 2021, në fund të prillit mori emrin Bashkia Dimal. Shumë keq që dimaliotët mos ta gëzonin shtëpinë e tyre të re”, u shpreh ajo.
Kryebashkiakja kritikoi mënyrën se si është hartuar projekti, duke thënë se vendimi është marrë pa transparencë dhe pa u mbështetur në treguesit e zhvillimit të bashkisë.
“Si mund të shkrihet një bashki e cila tregon që ka rritje të popullsisë? Pse duhet të shkrihet një bashki që investon me të ardhurat e veta edhe sot? Aq sa e ka investuar Bashkia Dimal në këto vite, ka investuar dhe qeveria shqiptare aty. Si do të merret më mirë shërbimi në Bashkinë Berat kur vetë distanca nga qendra është 23 km?”, tha Memaj.
Ajo u shpreh gjithashtu se propozimi për t’i lënë bashkitë e shkrira me status qyteti nuk garanton shërbime më të mira për banorët.
“Nënkryetari është një lloj si një administrator njësie. Që të kesh fuqi duhet të kesh në radhë të parë buxhetin tënd”, deklaroi ajo.
Në përfundim, Memaj i bëri thirrje Partisë Socialiste që, krahas mendimit të kryetarëve dhe këshillave bashkiakë, të dëgjojë edhe qytetarët që kanë dalë në protesta kundër reformës.
“Duket që protestat do të vijojnë. Mendimi qytetar duhet dëgjuar”, tha kryebashkiakja e Dimalit.
Projekti i propozuar nga Partia Socialiste parashikon një organizim të ri administrativo-territorial me 46 bashki, 71 qytete dhe 387 njësi administrative dhe ndodhet aktualisht në fazën e konsultimit publik.a.b
