Është zhvilluar mbrëmjen e së hënës protesta e 59-të kundër qeverisë në Tiranë, ku qytetarët u mblodhën fillimisht në Sheshin “Skënderbej” dhe Kryeministri dhe më pas nisën marshimin në rrugët e kryeqytetit.
Gjatë protestës, pjesëmarrësit hodhën thirrje si: “Rama jep dorëheqjen”, “Arrestoni Ramën”, duke kërkuar ndryshime politike dhe largimin e kryeministrit nga detyra.
Një prej qytetarëve mbajti një fjalim duke bërë thirrje për bashkimin e shqiptarëve brenda dhe jashtë vendit. Ai u kërkoi studentëve të reagojnë nëse, sipas tij, situata politike nuk ndryshon deri në shtator, ndërsa ftoi edhe diasporën t’i bashkohet protestave.
“Kam thirrje për studentët. Nëse këto qelbësira nuk largohen deri në shtator, dyert e universiteteve nuk do të hapen. Rama dhe Berisha do të ikin që këtu. I bëjmë thirrje diasporës që të vijë në këtë shesh. Do ta marrim pushtetin jo me dhunë. Mos bëni pushime, por t’i përkushtohemi këtij vendi. Rama në burg, Berisha në burg”, u shpreh ai.
Gjatë tubimit foli edhe aktivistja Arvina Lleshi, e cila renditi dhjetë arsye pse, sipas saj, qytetarët duhet të protestojnë.
“Arsyet për të protestuar janë të shumta. Protestojmë sepse 26 persona humbën jetën në Gërdec më 15 mars 2008; sepse shumë shkolla nuk kanë laboratorë dhe palestra; për shpopullimin; për çmimet e apartamenteve; për check-up; për kullat; për lumenjtë; sepse nuk e ngrini zërin për ne; sepse duam dorëheqje; dhe për mungesën e transparencës”, deklaroi Lleshi.
Një tjetër aktivist akuzoi qeverinë për dështime në fusha si arsimi, shëndetësia dhe infrastruktura, duke kërkuar ndërhyrjen e SPAK-ut ndaj kryeministrit.
“Çdo fenomen këtu është i lidhur me sabotimin dhe tradhtinë. Kjo klasë politike e ka lënë Shqipërinë pa arsim, pa shëndetësi dhe pa zhvillim. SPAK të arrestojë Ramën. Rrëzimi i kësaj qeverie është çështje mbarëkombëtare”, tha ai.
Protestuesit vijuan marshimin në rrugët e Tiranës, ndërsa organizatorët paralajmëruan se tubimet do të vazhdojnë edhe në ditët në vijim.m.k
