Një person me emrin Ermal Beqiri ndalohet në Francë, ndërsa burime të besueshne konfirmuan se ai është Ermal Beqiri i akuzuar në Tiranë për korrupsion me tenderat e AKSHI.
Biznesmeni Ermal Beqiri është ndaluar nga autoritetet franceze. Ndalimi i tij vjen në kuadër të urdhër-arrestit ndërkombëtar të lëshuar nga autoritetet shqiptare, ndërsa pritet të nisë procedura për ekstradimin e tij në Shqipëri.
Beqiri është nën hetim nga Prokuroria e Posaçme (SPAK) në kuadër të dosjes së njohur si ajo e AKSHI-t. Sipas autoriteteve, ai akuzohet për një sërë veprash penale, mes të cilave grup i strukturuar kriminal, kryerja e veprave penale nga grupi i strukturuar kriminal, shkelja e barazisë së pjesëmarrësve në tendera, konkurrenca e paligjshme me anë të dhunës, heqja e paligjshme e lirisë dhe pastrimi i parave.
Sipas hetimeve të SPAK, Beqiri dyshohet se ka qenë pjesë e një skeme që ndikonte në procedurat e prokurimeve publike dhe përfitonte kontrata me vlera të larta, ndërsa hetimet kanë përfshirë edhe pasuritë e tij dhe të personave të lidhur me të. Në kuadër të këtij procedimi janë sekuestruar pasuri të paluajtshme, automjete, llogari bankare dhe asete të tjera që dyshohet se burojnë nga aktiviteti kriminal.
Autoritetet shqiptare pritet të ndjekin procedurat ligjore për ekstradimin e Ermal Beqirit, ndërsa hetimet ndaj tij vijojnë.m.k
