Policia e Shtetit ka finalizuar operacionin e koduar “Filiali”, në kuadër të të cilit janë arrestuar tre zyrtare të filialit të Postës Shqiptare në Durrës, të dyshuara për përvetësimin e 69 milionë lekëve të rinj të destinuara për shpërndarjen e pensioneve dhe ndihmave sociale.
Operacioni u zhvillua nga Drejtoria për Hetimin e Krimit Ekonomik dhe Financiar, në bashkëpunim me Drejtorinë Vendore të Policisë Durrës dhe nën drejtimin e Prokurorisë së Durrësit.
Në pranga ranë Elisabeta Mataj, 41 vjeçe, drejtoreshë e filialit të Postës Shqiptare Durrës, Valbona Doni, 59 vjeçe, shefe e financës, si dhe Paola Dana, 39 vjeçe, arkëtare/llogaritare.
Sipas hetimeve, gjatë muajve prill dhe maj 2026, tre të ndaluarat dyshohet se nuk kanë arkëtuar në arkën e degëve të Shijakut dhe Krujës shumën prej 69 milionë lekësh të rinj, fonde të destinuara për pagesën e pensioneve dhe ndihmave sociale për qytetarët e këtyre zonave, duke i përvetësuar ato.
Ndaj tyre janë ngritur akuzat për veprat penale “Shpërdorimi i detyrës” dhe “Vjedhja duke shpërdoruar detyrën”, të kryera në bashkëpunim.
Policia bëri me dije se hetimet vijojnë për të identifikuar persona të tjerë që mund të jenë përfshirë në këtë skemë, ndërsa materialet procedurale i janë referuar Prokurorisë së Durrësit për veprime të mëtejshme.
