Mbledhja e Këshillit Kombëtar të Partisë Demokratike është shoqëruar me debate, pasi anëtarja Ilirjana Kuçana kërkoi që të hidhej në votim një rezolutë, duke iu referuar zbatimit të statutit të partisë. Ndërkaq anëtari tjetër i Këshillit Kombëtar, Lisandër Hoxha tha se nuk ishte marrë në konsideratë për diskutim një kërkesë e tij për procesin e votimit.
Debati nisi pasi kryetari i PD-së, Sali Berisha, prezantoi emrat e propozuar për nënkryetarët dhe sekretarët e rinj të partisë. Në atë moment, Kuçana mori fjalën dhe kërkoi që Këshilli të shqyrtonte dhe të votonte rezolutën, duke argumentuar se një procedurë e tillë parashikohet në statut.
Berisha u përgjigj se kishte biseduar më herët me Kuçanën për këtë çështje dhe i kërkoi asaj t’u përmbahej dispozitave statutore.
“Ke komunikuar me mua sot, të kam thënë ‘ndiqe statutin’, asgjë nuk ju mohohet”, u shpreh Berisha gjatë mbledhjes.
Më herët, përmes një reagimi publik, Ilirjana Kuçana u kishte bërë thirrje anëtarëve të Këshillit Kombëtar të votonin sipas ndërgjegjes dhe statutit, duke mos u ndikuar, sipas saj, nga orientimet e Sekretarit të Përgjithshëm të PD-së, Flamur Noka. Më pas para gazetarëve ajo sulmoi numrin 2 të PD duke theksuar se mbajtja e tij në garë nuk është ripërtëritje.
Ajo theksoi se demokratët presin ripërtëritje, meritokraci dhe një frymë të re në parti, ndërsa u kërkoi anëtarëve të Këshillit që vendimin ta marrin bazuar në bindjen e tyre dhe jo mbi udhëzime politike.
Ndërkaq Hoxha braktisi votimin. a.b
