Protestuesit kanë vijuar marshimin në rrugët kryesore të Tiranës, duke përshkuar bulevardin “Gjergj Fishta” dhe akse të tjera të kryeqytetit, ndërsa kanë hedhur parulla kundër qeverisë.
Gjatë marshimit, pjesëmarrësit kanë brohoritur në kor “Rama, SPAK you!”, si edhe sloganin “Parlamenti i krimit”, duke shprehur pakënaqësinë e tyre ndaj qeverisë.
Protesta, e cila ka hyrë në ditën e 44-t, ka nisur si zakonisht përpara godinës së Kryeministrisë, ku qytetarë dhe aktivistë kërkojnë dorëheqjen e kryeministrit Edi Rama.
Gjatë tubimit, aktivistja Luçiana Kokaj u bëri thirrje shqiptarëve që jetojnë në Belgjikë, Gjermani, Holandë dhe vende të tjera evropiane t’i bashkohen protestës që do të zhvillohet në Bruksel, në të njëjtën kohë kur delegacioni i qeverisë shqiptare do të ndodhet në kryeqytetin belg.
Sipas saj, pjesëmarrja e diasporës do të shërbejë për të përcjellë para institucioneve evropiane mesazhin e protestuesve në Shqipëri.
“Qeveria do të jetë nesër në Bruksel. Por kemi një lajm të bukur, vëllezërit tanë nga Gjermania, Holanda dhe Brukseli do të jenë aty duke protestuar”, deklaroi Kokaj.
Ajo u bëri thirrje bashkatdhetarëve të marrin pjesë në protestë për të dëshmuar, sipas saj, realitetin me të cilin përballen qytetarët shqiptarë.
Në përfundim të fjalës së saj, Kokaj theksoi se protestuesit mbështesin procesin e integrimit europian të Shqipërisë, por kërkojnë që ai të shoqërohet me përmirësimin e kushteve të jetesës dhe garantimin e dinjitetit për qytetarët.
“Jemi ne të parët që duam Bashkimin Europian, por duam të jetojmë me dinjitet në vendin tonë”, u shpreh ajo.
AI Generated VoiceFrom DRONI AI Project
