Policia e Shtetit ka finalizuar operacionin ndërkombëtar të koduar “Fury”, duke arrestuar në Durrës dy shtetas të kërkuar nga autoritetet e Maqedonisë së Veriut për vepra të rënda penale, ndërsa në pranga ka rënë edhe një person i dyshuar se u kishte siguruar dokumente të falsifikuara.
Operacioni u zhvillua nga Drejtoria e Forcës së Posaçme Operacionale e Departamentit të Policisë Kriminale, në bashkëpunim me Drejtorinë Vendore të Policisë Durrës, partnerët e Shërbimit Diplomatik të Sigurisë (DSS) në ambasadat e Shteteve të Bashkuara në Tiranë dhe Shkup, si dhe autoritetet ligjzbatuese të Maqedonisë së Veriut.
Në kuadër të operacionit u lokalizuan dhe u arrestuan në Durrës shtetasit M. Xh., 26 vjeç, i lindur në Shkup, dhe S. N., 34 vjeç, i lindur në Norvegji.
Sipas Policisë, ndaj tyre INTERPOL kishte lëshuar urdhra arresti ndërkombëtar për veprat penale të vrasjes, plagosjes, armëmbajtjes pa leje dhe pjesëmarrjes në organizatë kriminale në Republikën e Maqedonisë së Veriut.
Gjatë kontrollit, efektivët u gjetën dy të arrestuarve dokumente identifikimi të dyshuara të falsifikuara, të cilat dyshohet se i kishin përdorur për të dalë nga territori i Maqedonisë së Veriut dhe për t’iu shmangur drejtësisë.
Në vijim të operacionit, u arrestua në flagrancë edhe shtetasi Xh. R., 26 vjeç, nga Maqedonia e Veriut, i dyshuar për veprat penale “Përkrahja e autorit të krimit” dhe “Falsifikimi i dokumenteve”, pasi dyshohet se u kishte siguruar dokumentet e falsifikuara dy personave të kërkuar.
Gjatë kontrollit në banesën e tij, policia sekuestroi edhe një sasi të vogël lënde të dyshuar narkotike Cannabis Sativa, në cilësinë e provës materiale.
Materialet procedurale i janë referuar Prokurorisë për veprime të mëtejshme, ndërsa Policia e Shtetit falënderoi partnerët amerikanë të DSS për bashkëpunimin dhe koordinimin në realizimin e këtij operacioni ndërkombëtar.
