Policia e Lezhë ka identifikuar tre autorët e dyshuar të vrasjes së çiftit Kreshnik dhe Gentiana Mujeci, të ekzekutuar një ditë më parë me armë zjarri në fshatin Balldren. Lajmi u bë i ditur nga drejtori i Drejtorisë Vendore të Policisë Lezhë, Arben Nasufi, gjatë një konference për shtyp.
Sipas Policisë, pas hetimeve intensive dhe analizimit të provave materiale, janë identifikuar si autorë të dyshuar shtetasit A. M., 22 vjeç, F. M., 36 vjeç dhe R. M., 23 vjeç, të tre banues në Lezhë. Ata janë shpallur në kërkim, ndërsa vijon operacioni për lokalizimin dhe kapjen e tyre.
Ngjarja ndodhi më 26 prill 2026, rreth orës 14:50, në rrugën “Balldren-Torovicë”, ku persona të armatosur qëlluan në drejtim të automjetit që drejtohej nga Kreshnik Mujeci. Si pasojë e breshërisë së plumbave humbën jetën ai dhe bashkëshortja e tij, Gentiana Mujeci.
Nga hetimet rezulton se një automjet tip “Audi A4” ka ndjekur lëvizjet e viktimës, ndërsa më pas një mjet tjetër tip “Volkswagen”, pa targa, i ka prerë rrugën makinës së çiftit. Autorët dyshohet se kanë hapur zjarr nga ky automjet.
Policia bën me dije se pista kryesore e hetimit është hakmarrja. Ndërkohë, forcat speciale RENEA, Forcat Kombëtare të Sigurisë dhe strukturat vendore janë angazhuar në terren për arrestimin e të dyshuarve.
Paralelisht vijon puna për gjetjen dhe sekuestrimin e automjeteve dhe armëve të përdorura në krim.
