Është ndarë nga jeta akademiku i mirënjohur Rexhep Qosja, një nga figurat e rëndësishme të kulturës dhe mendimit shqiptar.
Familja ka bërë me dije se ai është varrosur sot në prani të një rrethi të ngushtë familjarësh, duke respektuar amanetin e tij për një ceremoni të thjeshtë dhe pa organizime publike.
“Njoftojmë se sot, më datë 23.4.2026 është ndarë nga jeta dhe është varrosur Rexhep Qosja. Varrimi u zhvillua në praninë e anëtarëve të ngushtë të familjes. Me dëshirë të të ndjerit, nuk do të organizohet ceremoni pritjeje nga familja. Familja nuk do të marrë pjesë në organizime institucionale. Lusim që privatësia jonë të respektohet dhe të na mundësohet të mbajmë zi në qetësi!”, njofton familja.
Rexhep Qosja lindi më 25 qershor 1936 në Vuthaj të Gucisë dhe njihet si shkrimtar, kritik letrar dhe historian me një kontribut të jashtëzakonshëm në kulturën shqiptare.
Si autor, ai la pas një krijimtari të pasur, ku spikat romani “Vdekja më vjen nga sy të tillë” (1974), i përkthyer në shumë gjuhë, si dhe vepra të tjera si “Një Dashuri dhe Shtatë Mëkate” (2003), “Nata është dita jonë” (2007), “Bijtë e askujt” (2010) dhe “Sekretet e Zbuluara” (2020).
Ai ishte Doktori i parë i Shkencave Filologjike në Kosovë dhe autor i dhjetëra studimeve, antologjive dhe monografive shkencore, përfshirë edhe një histori trevëllimëshe të letërsisë shqipe në periudhën romantike.
Përveç kontributit akademik dhe letrar, Qosja ka qenë një zë i rëndësishëm në çështjet kombëtare dhe ka marrë pjesë në përpjekjet për paqe gjatë Lufta e Kosovës.
Ngushëllime për ndarjen nga jeta të akademikut ka shprehur edhe Kryeministri Edi Rama, i cili në një mesazh publik shkroi: “LAMTUMIRË SHQIPTAR I MIRË”, duke i shprehur ngushëllime familjes, të afërmve dhe miqve të profesor Qoses.
