Nga Basir Çollaku
Kur iku Ilir Proda, i shumëpërfolur si banor i “ndikimit Çela” njëherësh edhe në hetim, e më pas erdhi kryepolic Skënder Hitaj, optimist-pesimistët përcollën opinionet e një mundësie të re policore në reagim. Iluzione të humbura. Asgjë më tepër. Nuk ka naiv të paditur të mos ketë bindje se drejtori i përgjithshëm i Policisë së Shtetit, emërohet nga Kryeministri. Këtë herë, Edi Rama, për arsye të shumta paniku e penale, bekoi zgjedhjen preferenciale të të pandehurës, vartëse, por edhe eprore të tij, Ballukut. Dihej me javë e kusur më herët, se Hitaj do të ishte zëvëndësuesi i Prodës. Shoqëruesi policor jo veprues, nëpër qarqe nga Dibra në Fier, kishte kohën e shpërblesës.
Prova…
Besim shefit, dështim pritshmërive.
Protesta e djeshme e PD dhe opozitës, ishte prova policore “Hitaj”. Me gjasë do të shënonte vetëpërmbajtje, proporcionalitet reagues e standard tjetër. Një përrallë e keqlexuar. Mandati “Hitaj” ka zero ndryshim me të ikurin. Protestuesit kundër Ramës e Ballukut, kishin drejtorin e Ramës e të Ballukut, e për t’i rritur adrenalinën pëlqyese shefave emërues. Drejtor Skënderi, u turr me nxitim ndaj deputetëve e qytetarëve. Mjaft të qeshë me delir Ramë-Bela, e t’i shpatullonin një bravo ushtarit të mirë Skënder. Deputetët demokratë, sekretari i përgjithshëm, Flamur Noka, nënkryetari Luçiano Boçi, deputeti Klevis Balliu, aktivisti-gazetar anëtar i Këshillit Kombëtar Aulon Kalaja u dhunuan dhe sulmuan me gaz e djegës me piper në distancë fizike të pagabueshme për njohje. Një metër, jo më tepër. Protestues të tjerë u qëlluan ngjashëm por edhe me plumba gome, teksa largoheshin, pa qenë aspak shkelës ligjesh apo veprim ekspozues rreziku ndaj askujt. Kush i urdhëroi?!
Dhuna po rritet sepse hallet me drejtësinë të Edi Ramës dhe të të pandehurës Belinda Balluku po shtohen.
A mundet të kontribuojë në hetimet e shumta ndaj këtyre eprorëve struktura e drejtuar tani nga drejtor Skënderi!?
A mundet të mbrojë dëshmitaren e kanosur nga Balluku, ashtu siç ka pohuar Prokuroria e Posaçme se ka ndodhur?
A mundet të pastrojë organizatën e policsë nga personat përdorues të sky-enchro si pjesë në dosje kriminale të trafikut të drogës dhe vrasjeve, siç ka deklaruar në Kuvend, ish-drejtuesi i SPAK, Altin Dumani?!
A mundet të ekzekutojë urdhër-arrestet për Troplinin e Suel Çelën, Ergys Agasin, e mjaft të tjerë profile kriminale me rrezikshmëri të lartë, kryemra të dosjeve të Prokurorisë së Posaçme akuzuar si drejtues të Organizatave Kriminale?
A mundet të riflasë me partnerët kush janë emrat me pushtet pas call-centerava mashtrimeve financiare që kërdisën dynjanë e livadhisin në mes të Tiranës, por arrestet shkojnë për ushtarë të vegjël?
Këto dhe shumë të tjera punë policore ka si ngarkesë punë për të zgjidhur, ushtari apo drejtori i mirë Skënder. Dhe jo të boshatisë magazinat e gazit e specit djegës policor për llogari të Ramës dhe Belës…
