Kreu i Partia Demokratike, Sali Berisha, ka bërë thirrje për një protestë mbarëkombëtare këtë mbrëmje në orën 19:00, duke e cilësuar atë si kryengritjen paqësore më të fuqishme që ka njohur Shqipëria.
Në një deklaratë për gazetarët, Berisha u shpreh se qytetarët e Tiranës dhe të gjithë vendit do të ngrihen kundër dhunës dhe terrorit të regjimit, duke theksuar se ka shumë arsye që i shtyjnë qytetarët të dalin në shesh.
Ai akuzoi drejtpërdrejt kryeministrin Edi Rama për vendimmarrje që dëmtojnë shtetin ligjor dhe demokracinë, si dhe për mbrojtje të zyrtarëve të lartë nga përballja me drejtësinë. Në deklaratë përmendet edhe çështja e zëvendëskryeministres Belinda Balluku e cila është mbrojtur politikisht.
Berisha theksoi gjithashtu se situata ekonomike, veçanërisht çmimi i lartë i naftës, ka rënduar jetën e qytetarëve, duke e konsideruar këtë si një nga arsyet kryesore të reagimit qytetar. Sipas tij, politikat fiskale dhe mungesa e subvencioneve për fermerët kanë sjellë pasoja negative për ekonominë dhe bujqësinë në vend.
Në fund të thirrjes, lideri i opozitës u bëri apel qytetarëve që të lënë pas frikën dhe konformizmin dhe t’i bashkohen protestës paqësore.a.b
