Drejtoria Vendore e Policisë Tiranë ka reaguar zyrtarisht për një incident të ndodhur mbrëmjen e 16 prillit 2026 në rrugën “Kavajës”, ku është përfshirë avokati Altin Goxhaj.
Sipas Policisë, rreth orës 20:00, patrulla e Komisariatit të Policisë Nr. 2 ishte duke ushtruar kontrolle ndaj automjeteve të parkuara në korsinë e dedikuar, kur një mjet taksi është ndalur pas automjetit të Policisë. Efektivët i kanë kërkuar drejtuesit të vijojë lëvizjen, por nga automjeti ka zbritur Goxhaj, i cili, sipas uniformave blu, ka ofenduar dhe kundërshtuar punonjësit gjatë kryerjes së detyrës. Në konflikt është përfshirë edhe drejtuesi i mjetit, një 26-vjeçar me inicialet A.B.
Në këto kushte, Policia ka bërë shoqërimin e Goxhajt në ambientet e Komisariatit Nr. 2, ndërsa bëhet me dije se ai ka vijuar kundërshtimin edhe gjatë shoqërimit. Në përfundim të veprimeve procedurale, ai është proceduar penalisht për veprën “Mosbindja ndaj urdhrit të punonjësit të Policisë së rendit publik”.
Ngjarja fillimisht shkaktoi reagime dhe aludime në rrjet, pasi u raportua si një rast i mundshëm rrëmbimi. Sqarimi i Policisë erdhi pas publikimeve të ambientalistit Sazan Guri, i cili ngriti shqetësimin për mënyrën e ndalimit.
“Lajm i kobshëm! Thonë që avokati dhe zëri i fortë kritik i qeverisë Altin Goxhaj është arrestuar nga një grup në emër të policisë, por pa uniformë policie, dhe askush nga komisariatet nuk të thotë një fjalë?”, shkroi fillimisht Guri në një postim në rrjetet sociale.
Policia e Tiranës thekson se mbetet e angazhuar për respektimin e ligjit, garantimin e rendit publik dhe mbrojtjen e të drejtave të qytetarëve.
