Kreu i Partisë Demokratike, Sali Berisha, ka bërë të ditur se opozita po përgatit një platformë të re për përballimin e rritjes së çmimeve, ku masa e parë do të jetë ulja e TVSH-së për ushqimet bazë.
Në një komunikim për mediat, Berisha u shpreh se Partia Demokratike po shqyrton situatën ekonomike dhe do të paraqesë së shpejti një paketë konkrete për qytetarët, duke theksuar se reduktimi i TVSH-së në 6% për ushqimet e shportës është një domosdoshmëri.
Deklarata e tij erdhi pas shqetësimeve të ngritura nga qytetarët për rritjen e çmimeve dhe pamjaftueshmërinë e të ardhurave mujore për të përballuar jetesën.
Berisha kritikoi gjithashtu qeverinë për premtimet e pambajtura, duke kujtuar se ulja e TVSH-së për ushqimet dhe energjinë ishte premtuar që në vitin 2013, por sipas tij nuk është realizuar.
Ai theksoi se, pavarësisht deklarimeve për rritje pagash, Shqipëria vijon të ketë nivelin më të ulët të pagave në rajon, ndërsa krahasoi situatën me vendet fqinje, si Maqedonia e Veriut dhe Kosova, ku sipas tij çmimet e ushqimeve janë më të ulëta dhe TVSH-ja për to është më e reduktuar.
Sipas Berishës, ulja e TVSH-së për produktet bazë do të ndikojë drejtpërdrejt në lehtësimin e kostos së jetesës për qytetarët dhe do të jetë një nga prioritetet kryesore të programit të Partisë Demokratike.a.b
