Dekonspirimi i aksionit për call-centerat ishte sot në qendër të deklaratave që kreu i PD, Sali Berisha bëri në SPAK. Sipas tij dekonspirimi vërteton deklaratën e prokurorit të antimafies së Napolit se Shqipëria është më keq se narko-shtet.
“Ju e patë, kati i 13-të ku agjentët e La Liene kanë punuar dy vite aty dhe u kanë dhënë çdo informatë ekipit që hetonte, kanë të gjitha fotot dhe videot, dhe dokumentet për veprimtarinë, ata kur shkuan e gjetën të boshatisur dhomën sepse kishin hequr të gjithë kompjuterët.
Çka vërteton edhe njëherë deklaratën e prokurorit të antimafies të Napolit, i cili thotë se Shqipëria është më keq se narko-shtet.
Është më keq se narko-shtet, thotë, sepse të dekonspirojnë çdo gjë”, deklaroi Berisha.
Dhe në vijim ai e lidhi industrinë mafioze të call center mashtruese me Amant Josifin dhe Olsi Ramën.
“Ja, ky është fakti se kur autoritetet gjermane sollën për Amant Josifin dokumentet dhe doli Olsi Rama patron i tij, Altin Troplini nuk hapi çështje penale ndaj tij.
Kur Amant Josifi e gjetën autoritetet spanjolle se ishte në Dubai, Amant Josifi përsëri nuk u shpall në hetim nga Altin Troplini sepse ishte ortak me të Olsi Rama.
Pra, kjo quhet një veprimtari kriminale e gjeneralizuar e narko-shtetit”, deklaroi Berisha. a.b
