Kulla ku ishte call center
Aksioni i autoriteteve kundër një rrjeti Call Center-ash është dekonspiruar që në fazat e para, duke u dhënë kohë organizatorëve të zhvendosin pajisjet dhe të boshatisin ambientet përpara ndërhyrjes së policisë.
“Ekzistojnë indicie të qarta se mbrëmjen e datës 15 janar 2026, pas përfundimit të punës, pjesëtarë të këtij personeli vëzhgues kanë njoftuar pronarët e Qendrës për një ndërhyrje të mundshme. Pas kësaj, në orët e para të mëngjesit të datës 16 janar 2026, janë larguar pajisjet dhe është boshatisur ambienti i Qendrës së Thirrjeve”, thuhet në njoftimin zyrtar të SPAK.
Sipas SPAK, pasi u informuan për një ndërhyrje të mundshme të autoriteteve, organizatorët vepruan menjëherë gjatë natës së 15–16 janarit, duke larguar pajisjet nga Call Center-i dhe duke i transportuar ato drejt një ambienti tjetër në godinën “Downtown One”, në bulevardin “Bajram Curri”.
Gjatë këtij veprimi, disa persona u kapën në flagrancë teksa transportonin pajisje kompjuterike. Në ambientin e ri, hetuesit gjetën një Call Center tjetër në ndërtim, si dhe kompjutera, telefona, serverë, karta SIM, hard disqe dhe dokumente të ndryshme. Po ashtu, persona të tjerë u kapën në flagrancë duke transportuar një kosh mbeturinash me sende të dyshuara të marra nga qendra e thirrjeve në rrugën “Ibrahim Rugova”, të cilat po përpiqeshin t’i asgjësonin.
Në total, janë arrestuar në flagrancë 6 persona, ndërsa për 2 të tjerë janë ekzekutuar urdhra ndalimi. Janë shpallur në kërkim edhe 3 persona të tjerë, konkretisht tre vëllezërit Prekaj: Agim, Alfred dhe Arjan Prekaj, të dyshuar si organizatorët e kësaj skeme.
Gjatë kontrolleve në 28 ambiente të ndryshme janë sekuestruar qindra pajisje kompjuterike, sisteme kamerash, dokumente, automjete, motomjete, si dhe një automjet luksoz Ferrari, që dyshohet se i përket organizatorëve të aktivitetit kriminal.a.b
