Pamje nga Dhërmiu
Hetimet ndaj shtetasve spanjollë të dyshuar për një skemë të gjerë mashtrimi financiar janë zgjeruar edhe për veprën penale të pastrimit të parave, pas sekuestrimit të pasurive dhe bizneseve në Shqipëri nga Prokuroria e Tiranës.
Burime nga hetimi bëjnë me dije se, nga kontratat e sekuestruara për rreth 23 hektarë tokë në zonën e Dhërmiut, rezulton se pronat janë blerë me një çmim shumë më të ulët se vlera reale e tregut, rreth 7 euro për metër katror. Autoritetet dyshojnë se këto transaksione janë përdorur për të legalizuar para me origjinë të paligjshme, të përfituara përmes një skeme tip Ponzi, e ngritur në disa shtete.
Sipas dokumentacionit, pjesa më e madhe e sipërfaqes së tokës është blerë nga shtetasi Fiksi Gjikuria, ndërsa Prokuroria pritet të thërrasë për t’i marrë në pyetje ish-pronarët e tokës, në përpjekje për të zbardhur rrethanat e shitblerjeve dhe burimin real të fondeve.
Ky zhvillim vjen në vijim të operacionit të Prokurorisë së Tiranës, e cila më herët vendosi sekuestro mbi mbi 33 hektarë tokë në Dhërmi, shoqëri tregtare, automjete luksoze dhe llogari bankare, në kuadër të hetimit ndaj shtetasit spanjoll A.C. dhe personave të lidhur me të. Ata dyshohet se kanë përfituar rreth 30 milionë euro duke krijuar kompani fiktive në disa vende, përfshirë edhe Shqipërinë..a.b
