5 persona të maskuar hynë në një lokal dhe dhunuan dy persona të tjerë me qyta pistolete. Policia thotë se në konflikt u përfshinë 4 persona.
Rreth orës 12:30, në ambientet e një lokali në Lezhë, shtetasit Gjergj Marku, 41 vjeç dhe Nikolin Marku 41 vjeç (kushërinj), dyshohet se janë konfliktuar për motive të dobëta, me shtetasit Gëzim Ndoka rreth 53 vjeç dhe Kevin Ndoka rreth 20 vjeç (babë e bir), vëllai dhe nipi i ish deputetit të PS Arben Ndoka.
“Si pasojë janë dëmtuar shtetasit Gj. M. dhe N. M., të cilët pasi kanë marrë asistencën e nevojshme mjekësore, janë paraqitur në ambientet e Komisariatit, ku kanë pretenduar se shtetasit G. N. dhe K. N. kanë qenë të armatosur.
Vijojnë kërkime intensive për kapjen e shtetasve G. N. dhe K. N., si dhe një grup i posaçëm hetimor po punon në drejtimin e Prokurorisë së Lezhës, për të zbardhur dhe dokumentuar të gjitha rrethanat e këtij rasti”, njoftoi policia e Lezhës. a.b
