Hetimet e Prokurorisë së Posaçme kundër Korrupsionit dhe Krimit të Organizuar (SPAK) në lidhje me zëvendëskryeministren dhe ministren e Infrastrukturës dhe Energjisë, Belinda Balluku, kanë vijuar edhe gjatë ditës së sotme.
Burime bëjnë me dije se SPAK ka ushtruar kontrolle dhe ka kryer sekuestrime dokumentesh në disa subjekte private, të cilat dyshohet se janë të lidhura me procedurat e tenderimit për lotet e Unazës së Madhe të Tiranës. Kontrolle janë bërë tek biznesi i Arben Abazit, nipi i Sadri Abazit, ish deputet i PS.
Subjektet e kontrolluara rezultojnë të kenë qenë pjesë e proceseve të prokurimit publik ose të kenë pasur marrëdhënie kontraktuale me institucionet përgjegjëse për këto projekte infrastrukturore.
Hetimet po fokusohen në verifikimin e ligjshmërisë së procedurave të ndjekura, dyshimet për shkelje të barazisë në tendera, si edhe përfitime të paligjshme të mundshme në dëm të buxhetit të shtetit. Burimet sqarojnë se kontrollet janë pjesë e një hetimi më të gjerë dhe nuk përjashtohet zgjerimi i tij në subjekte të tjera. a.b
