Pamje nga tregu pas shuarjes së zjarrit
Zjarri që përfshiu mbrëmjen e 8 janarit tregun e rrobave të përdorura në zonën e “5 Majit” në Tiranë ka shkaktuar dëme të mëdha materiale dhe ka sjellë tensione mes tregtarëve. Pamjet e fundit të siguruara me dron nga Klan News tregojnë situatën e rëndë në zonë, ku edhe këtë të premte vijojnë të ngrihen shtëllunga tymi mbi ambientet e shkrumbura, duke evidentuar përmasat e dëmeve.
Ndërhyrja e forcave zjarrfikëse po vazhdon ende, pasi disa vatra zjarri mbeten aktive në kapanonet A dhe B. Dëmet materiale vlerësohen si shumë të konsiderueshme, me disa tregtarë që flasin për humbje në miliona lekë. Një prej tyre, pronar i një prej dyqaneve më të vogla në treg, deklaron se dëmi i shkaktuar i kalon 200 milionë lekë.
Gjatë ditës së sotme është regjistruar edhe një incident në treg, ku një tregtar ka akuzuar një përgjegjës të tregut për përgjegjësi lidhur me zjarrin. Debati ka agravuar, duke kërkuar ndërhyrjen e policisë, e cila ka shoqëruar personat e përfshirë në konflikt.
Sipas hetimeve paraprake, dyshohet se zjarri është shkaktuar nga një shkëndijë elektrike në një prej dyqaneve, e cila më pas është përhapur me shpejtësi edhe në bizneset përreth.
Përveç humbjeve ekonomike, zjarri ka sjellë edhe ndotje të konsiderueshme mjedisore. Tymi i dendur ka ndotur ajrin në zonat përreth Tiranës, duke shkaktuar shqetësim te banorët. Ndërkohë, bizneset që nuk u përfshinë drejtpërdrejt nga flakët, por u dëmtuan nga nxehtësia, po i nënshtrohen verifikimeve nga autoritetet. Tregtarët kanë nisur gjithashtu të nxjerrin mallrat që kanë mundur t’i shpëtojnë zjarrit. a.b
