Qindra banorë të Vlorës protestuan sonte kundër bashkisë duke prishur edhe mbrëmjen gala nga pushteti pasi qëndruan 4 ditë pa ujë.
Ata janë grumbulluar mbrëmjen e sotme rreth Teatrit “Petro Marko”, aty ku Bashkia e Vlorës po zhvillonte një aktivitet festiv në kuadër të festave të fundvitit. Të revoltuar nga mungesa e ujit të pijshëm, qytetarët kanë hapur portat e godinës dhe kanë hyrë brenda, duke lëshuar thirrje të forta kundër qeverisë.
“Duam ujë” ishte një nga thirrjet kryesore të protestuesve vlonjatë, të cilët pushtuan sallën e teatrit dhe kërkuan që kryetarja e bashkisë të dilte për t’i takuar. Gjatë protestës u dëgjuan edhe thirrje “Poshtë qeveria”.
Banorët e Vlorës, që prej katër ditësh përballen me mungesë të ujit të pijshëm, kërkuan zgjidhje të menjëhershme nga autoritetet vendore. Situata u tensionua në momentin kur disa protestues thyen kordonin e policisë dhe hynë në ambientet e brendshme të teatrit.
Forca të shumta policie u vendosën brenda dhe jashtë godinës, duke u kërkuar qytetarëve të dalin jashtë. Ndërkohë, protestuesit shprehën indinjatën e tyre ndaj, sipas tyre, mosveprimit të institucioneve lokale dhe paralajmëruan se protestat do të vijojnë deri në dhënien e një përgjigjeje konkrete për furnizimin me ujë të pijshëm. a.b
