Një grua shqiptare ka humbur jetën tragjikisht në Tajlandë, pasi u mbyt teksa po notonte në det. Mediat lokale raportojnë se viktima është identifikuar si Daniela Idrizi, 41 vjeç.
Sipas informacioneve, ajo ndodhej në Phuket së bashku me bashkëshortin e saj, Mohammed Abdulkhaliya Hamdi Alsaba, 43 vjeç, me shtetësi egjiptiane. Çifti kishte mbërritur në qytetin turistik vetëm dy orë para ngjarjes tragjike.
Ata kishin zgjedhur të kalonin kohë në plazhin Karon dhe kishin hyrë në det për të notuar. Rreth dhjetë minuta më pas, bashkëshorti i Idrizit vuri re se ajo ishte zhdukur nga pamja dhe menjëherë kërkoi ndihmë.
Rojet e plazhit dhe ekipet e shpëtimit reaguan me shpejtësi. Pas një ore kërkimesh, trupi i pajetë i saj u gjet nga rojet bregdetare dhe u nxor nga deti pa shenja jete.
Ekipet mjekësore nga Spitali Chalong mbërritën menjëherë në vendin e ngjarjes dhe u përpoqën t’i jepnin ndihmën e parë, por përpjekjet për ta rikthyer në jetë rezultuan të pasuksesshme.
