Policia e Tiranës ka arrestuar një 26-vjeçar dhe ka shpallur në kërkim një tjetër, pasi dyshohet se mashtruan një biznesmen nga Lushnja, duke i marrë 6 mijë euro me premtime të rreme.
Në pranga ka rënë Ervis Belollari, i njohur në TikTok me pseudonimin “Delluks”, ndërsa po punohet për kapjen e bashkëpunëtorit të tij, Arsen Matollari, 32 vjeç. Hetimet u kryen nga Komisariati nr. 6, dhe në një video të publikuar nga policia shihet momenti kur njëri prej të dyshuarve merr paratë nga viktima.
Sipas hetimeve, dy të rinjtë kanë telefonuar biznesmenin duke u prezantuar si kryetar bashkie dhe zyrtar i lartë. Ata i kanë kërkuar 6 mijë euro, duke pretenduar se një i afërm i tyre kishte nevojë për trajtim mjekësor në një spital privat në Tiranë. Biznesmeni, duke besuar në historinë e tyre, ia ka dorëzuar shumën, por pas disa ditësh është kontaktuar sërish dhe i janë kërkuar edhe 7 mijë euro të tjera.
Dyshimet e tij se po mashtrohej e çuan të bënte denoncimin në polici, duke bërë të mundur zbulimin dhe arrestimin e njërit prej autorëve. Ndërkohë, vijon puna për kapjen e personit të dytë të përfshirë në këtë skemë mashtrimi. r.k
