Një komisioner i vetingut në drejtësi nga 3 të tillë është emëruar ditët e fundit në një post të rëndësishëm në ministrinë e Bujqësisë duke ngritur dyshime të forta në lidhje me integritetin e vendimeve të tij gjatë vetingut të gjyqtarëve dhe prokurorëve.
Drejtori i Autoritetit Kombëtar të Ushqimit, është larguar ditë mënparë dhe në krye ka ardhur, Olsi Komici, i cili deri më tani ka kryer detyrën e komisionerit në Komisionin e Pavarur të Kualifikimit, pra në një nga organet e reja të drejtësisë që u mor me procesin e vetingut, të heqjes së prokurorëve dhe gjyqtarëve.
Për këtë ka reaguar edhe anëtari i kryesisë së PD, Grigels Mucollari.
“Nuk ka dyshim se kreu i AKU duhej të mbante përgjegjësi dhe duhej të largohej nga ajo detyrë, për shkak të dështimit sistematik dhe për shkak të pasigurisë ushqimore që ekziston sot në Shqipëri.
Problemi është se qeveria dhe Kryeministri e shohin këtë zyrë, jo si një përgjegjësi të madhe publike, por si një post për të kënaqur interesat e për të shpërblyer fluksin e tyre.
Ky emërim, i një komisioneri të rëndësishëm të vetingut në agjenci qeveritare, dëshmon po ashtu mungesën e pavarësisë së këtij procesi në drejtësi”, thekson Muçollari. a.b
