Kryeministri Edi Rama ka hedhur poshtë me forcë pretendimet e gazetarit izraelit Amit Segal, i cili ka raportuar se Shqipëria është në negociata me administratën amerikane për të pranuar mbi 100 mijë refugjatë palestinezë nga Gaza. Në një postim në rrjetet sociale, Segal deklaroi se, pas refuzimit të Egjiptit dhe Jordanisë për të strehuar refugjatët, administrata Trump ka nisur bisedime me Shqipërinë dhe Indonezinë.
Rama e cilësoi këtë lajm “të rremë” dhe shtoi se Shqipëria nuk ka marrë asnjë kërkesë të tillë. “Nuk kam dëgjuar diçka kaq të rreme për shumë kohë dhe ka pasur shumë lajme të rreme kohët e fundit! Nuk është absolutisht e vërtetë,” deklaroi kryeministri.
Ai theksoi se Shqipëria, si çdo vend tjetër europian, është e gatshme të ndihmojë popullin palestinez në kuadër të solidaritetit ndërkombëtar, por nuk ka kapacitet për të ndërmarrë hapa të tillë të jashtëzakonshëm. Rama rikonfirmoi mbështetjen e Shqipërisë për popullin palestinez dhe të drejtën e tij për të jetuar në një shtet demokratik e të pavarur, duke shtuar se Hamas ka qenë një faktor destruktiv për vetë palestinezët dhe për stabilitetin në rajon.
“Jemi krenarë për miqësitë tona të forta me Izraelin, Emiratet e Bashkuara Arabe, Arabinë Saudite, Katarin, Kuvajtin dhe, natyrisht, me popullin palestinez, shtetin e të cilit Shqipëria e ka njohur shumë kohë më parë,” deklaroi Rama.
Kryeministri shtoi se Shqipëria, si një vend në zemër të Europës, mund të kontribuojë në zgjidhjen e çështjeve humanitare në përputhje me angazhimet ndërkombëtare, por në këtë rast asnjë marrëveshje apo diskutim i tillë nuk është bërë. Ai përfundoi duke theksuar se paqja dhe një zgjidhje e drejtë për palestinezët janë qëllimet e vërteta që duhet të ndiqen nga komuniteti ndërkombëtar. m.k
/DRONI.al/
Për t’u bërë pjesë e grupit të "DRONI.al - Agjencia Kombëtare e Lajmeve" mjafton të klikoni: Join Group dhe kërkesa do t’ju aprovohet.
KOMUNITETI DRONI.AL: https://www.facebook.com/groups/426976918158037/
