Gjatë natës, reshjet e dëborës kanë vijuar në zonat veriore dhe juglindore të vendit, të shoqëruara me ulje të ndjeshme të temperaturave dhe erëra të forta. Pavarësisht motit të vështirë, grupet e punës kanë qenë të angazhuara në pastrimin e rrugëve dhe shpërndarjen e kripës për të shmangur ngricat.
Sipas autoriteteve, të gjitha segmentet rrugore nacionale janë aktualisht të hapura dhe të qarkullueshme. Megjithatë, në akset me prezencë dëbore rekomandohet përdorimi i gomave dimërore ose zinxhirëve për të shmangur aksidentet dhe bllokimet.
Situata në veri:
Në akset Vaudejes-Pukë-Fushë Arrëz-Kalimash, reshjet e dëborës vijojnë, ndërsa në Qafë Mali trashësia e dëborës ka arritur deri në 50 cm. Gjendje e ngjashme raportohet në:
•Skurraj-Peshkopi
•Kukës-Ura e Zapodit
•Kukës-Krumë-Kam
•Kukës-Bushtricë
•Kuben-Vasije
•Ura Fanit-Shpal
•Shpal-Ura e Repsit
Në këto zona, era ka krijuar grumbullime dëbore, duke e bërë të domosdoshëm përdorimin e gomave dimërore ose zinxhirëve.
Rajoni qendror:
Në rrugën e Dajtit dhe segmente si Qafë Prisk-Qafë Mollë-Bizë dhe kilometrat e fundit të rrugës Librazhd-Steblevë, reshjet e dëborës kanë sjellë vështirësi në qarkullim. Edhe këtu rekomandohen masa paraprake për drejtuesit e automjeteve.
Rajoni juglindor:
Në rajonin e Korçës reshjet kanë prekur akset kryesore:
•Qafë Thanë
•Qafë Plloçë
•Korçë-Dardhë
•Korçë-Voskopojë
•Korçë-Ersekë
•Ersekë-Leskovik
Borëpastrueset janë në terren, por drejtuesve u bëhet thirrje të shmangin qarkullimin me goma verore, të cilat jo vetëm krijojnë vështirësi, por edhe pengojnë punën e mjeteve borëpastruese.
Policia apelon për kujdes maksimal, veçanërisht në zonat me reshje të dendura dhe erë, duke kërkuar respektimin e masave për qarkullim të sigurt.
