Dymbëdhjetë persona, përfshirë dy fëmijë, humbën jetën dhe katër të tjerë mbetën të plagosur rëndë pasditen e 1 janarit në Cetinje të Malit të Zi, raporton A2 CNN. Autori i dyshuar, Aco Martinoviç, ndërroi jetë gjatë transportit për në spital pasi qëlloi edhe veten me armë zjarri.
Sipas prokurores Andrijana Nastiç, ngjarja ndodhi në pesë lokacione të ndryshme, ndërsa vetëvrasja e autorit ndodhi në një të gjashtë. Katër burra u vranë në një tavernë pas një konflikti që shpërtheu aty. Në lokacionin e dytë pati katër viktima të tjera, ndërsa dy fëmijë u qëlluan për vdekje në një rrugë. Dy persona të tjerë u vranë në zona të tjera. Katër të plagosurit u transportuan në Qendrën Klinike të Podgoricës, ku ndodhen në gjendje kritike.
Ministri i Punëve të Brendshme, Danillo Sharanoviç, tha gjatë një konference urgjente se motivi i masakrës është ende i panjohur, duke theksuar se mes viktimave ishin edhe miq dhe të afërm të autorit. Ai sqaroi se Martinoviç ishte dënuar me kusht në vitin 2005 për sjellje të papërshtatshme dhe në vitin 2022 ishte dënuar me tre muaj burg për mbajtje të armëve dhe eksplozivëve.
Kryeministri i Malit të Zi, Millojko Spajiç, e cilësoi ngjarjen si një tragjedi të tmerrshme dhe njoftoi se qeveria po shqyrton masa më të ashpra për mbajtjen e armëve. Në shenjë zie, qeveria shpalli tri ditë zie kombëtare, më 2, 3 dhe 4 janar, ndërsa koncertet e Vitit të Ri të planifikuara në Podgoricë, Budva dhe Kotor u anuluan. a.b
/DRONI.al/
Për t’u bërë pjesë e grupit të "DRONI.al - Agjencia Kombëtare e Lajmeve" mjafton të klikoni: Join Group dhe kërkesa do t’ju aprovohet.
KOMUNITETI DRONI.AL: https://www.facebook.com/groups/426976918158037/
