Gjykata e Tiranës ka vendosur masën e sigurisë “arrest në burg” për pesë persona të arrestuar në kuadër të një operacioni kundër një grupi të dyshuar për trafikim armësh mes Shqipërisë dhe Kosovës. Të arrestuarit që do të qëndrojnë në paraburgim janë Aurel Manreka, Gersi Llozha, Kleu Mucalliu dhe Tonin Shkami.
Ndërkohë, për Euxhenio Manushin, i cili ishte arrestuar disa ditë më parë edhe për një tjetër vepër penale pasi u kap me 1.5 kg kokainë në makinë së bashku me shokun e tij Klajdi Serjani, seanca për caktimin e masës së sigurisë lidhur me akuzën e trafikut të armëve u shty për të dielën, më 15 dhjetor.
Në total, gjatë operacionit janë lëshuar 14 urdhër-arreste nga policia e Shqipërisë në bashkëpunim me autoritetet e Kosovës. Gjashtë prej tyre u arrestuan në Shqipëri, ndërsa të tjerët në Kosovë.
Gjatë aksionit, policia sekuestroi 22 armë zjarri të tipit ‘Zoraki’, një armë automatike AK-47, një granatë dore dhe 470 fishekë të llojeve të ndryshme. Po ashtu, u konfiskuan tre automjete, shuma të konsiderueshme parash dhe dhjetë aparate celulare. r.k
