Prokuroria Speciale ka arrestuar sot edhe ish zv/kryeministrin e Kosovës, Hajredin Kuçi, krahas tre ish zyrtarëve të tjerë të Kosovës, përfshirë edhe ish shefin e shërbimit sekret Bashkim Smakaj.
Ushtruesi i detyrës së Kryetarit të Organizatës së Veteranëve të Luftës së Ushtrisë Çlirimtare të Kosovës (OVL-UÇK), Faton Klinaku, ka konfirmuar për Telegrafin se është arrestuar ish-kryetari i Agjencisë së Kosovës për Inteligjencë (AKI), Bashkim Smakaj, dhe ish-zëvendës kryeministri, Hajredin Kuçi.
Zyra e Prokurorit të Specializuar (ZPS) ka konfirmuar se po kryen operacione në Kosovë, por nuk ka dhënë detaje lidhur me personat e arrestuar.
“Zyra e Prokurorit të Specializuar (ZPS) po kryen operacione në vazhdimësi në Kosovë në një proces hetimor që përqendrohet në vepra penale kundër administrimit të drejtësisë. Operacionet e ZPS-së janë autorizuar nga ana gjyqësore prej Dhomave të Specializuara të Kosovës (DHSK) dhe janë mbështetur nga Misioni i Bashkimit Evropian për Sundimin e Ligjit në Kosovë (EULEX)”, thuhet në komunikatën e Zyrës së Prokurorit të Specializuar.
Ish-komandanti i Ushtrisë Çlirimtare të Kosovës, ish kryetar komune, Isni Kilaj, ish-këshilltari i Hashim Thaçit, Bashkim Smakaj dhe Fadil Fazliu, vëllai i heronjve Fahri e Bahri Fazliut janë arrestuar sot në mëngjes. a.b
