Kreu i PD, Sali Berisha ka bërë një deklaratë të fortë, duke përshëndetur nismën që pretendohet se po diskutohet në Australi për të shpallur financuesin dhe miliarderin Xhorxh Soros si një “terrorist global”. Në një deklaratë për shtyp, Berisha thekson se ky është një hap i rëndësishëm kundër një figure që, sipas tij, ka kryer krime monstruoze në shumë vende të botës.
“Ky është një lajm shumë i rëndësishëm dhe këtë e ka bërë publik në Twitter-in e tij presidenti Donald Trump,” shprehet Berisha. Ai e cilëson këtë nismë si një përpjekje të rëndësishme për drejtësi dhe shton se Soros duhet të ishte gjykuar prej kohësh në Gjykatën Ndërkombëtare të Hagës.
“Për 40 vite ky person ka kryer krime monstruoze kundër njerëzimit, duke dëmtuar ekonomikisht vende si Tajlanda, Indonezia, Italia dhe Britania. Megjithatë, është për t’u përgëzuar që një vend si Australia, i njohur për shtetin ligjor dhe demokracinë, po merr një hap kaq të guximshëm,” theksoi Berisha.
Berisha e konsideron këtë zhvillim si një nismë që duhet përkrahur nga të gjitha vendet demokratike dhe shpreh mirënjohjen për qeverinë australiane, duke u lutur që ajo të përfundojë me sukses. r.p
