Departamenti amerikan i Shtetit (DASH) nuk ka asnjë qortim në lidhje me aksionin që kreu policia shqiptare një ditë mënparë në kampin e MEK në Manëz ku janë të strehuar rreth 3.000 pjesëtarë të opozitës iraniane.
“Policia e Shtetit në Shqipëri na ka siguruar se të gjitha veprimet janë kryer në përputhje me ligjet në fuqi, përfshirë mbrojtjen e të drejtave dhe lirive të të gjithë personave në Shqipëri.
Ne mbështesim të drejtën e Qeverisë së Shqipërisë për të hetuar çdo veprimtari të mundshme të paligjshme brenda territorit të saj”, thuhet në një deklaratë nga një zëdhënës i Departamentit amerikan të Shtetit, cituar nga Evropa e Lirë.
Zëdhënësi i DASH-it gjithashtu shtoi se SHBA-ja nuk e cilëson MEK-un “lëvizje opozitare të qëndrueshme demokratike që përfaqëson popullin iranian”, por ka “shqetësime serioze për MEK-un si organizatë, përfshirë akuzat për abuzim të kryera kundër anëtarëve të tij”. a.b
