Ish kreu i Bashkisë së Durrësit Vangjush Dako është arrestuar pasi u dorëzua më herët në drejtorinë e Policisë së Tiranës.
Mësohen disa nga emrat për të cilët u lëshuan urdhër-arrestet nga SPAK për zyrtarë dhe ish-zyrtarë të Bashkisë së Durrësit, përfshi edhe ish-kryebashkiakun Vangjush Dako.
Dako akuzohet për shpërdorim detyre, në lidhje me një pallat të ndërtuar në qendër të qytetit të Durrësit, godinë e cila pësoi dëme të mëdha nga tërmeti i vitit 2019.
Kallëzimi për zotin Dako dhe ish zyrtarë të tjerë është bërë për vrasje masive të mbetur në tentativë nga ana e banorëve.
Gjithashtu mësohet se hetimi i SPAK për Dakon është shtrirë edhe në verifikimin e pasurisë duke kërkuar verifikime nga institucione të ndryshme.
Efektivët e policisë ndodhen në banesën e Dakos për kontroll.
Një tjetër emër i njohur për të cilin SPAK lëshoi urdhër-arrest, është ish-drejtori i Urbanistikës së Durrësit, Adhurim Qehahaj, por edhe ndërtuesi Fiqiri Faruku.
Urdhër-arreste janë lëshuar edhe ndaj disa ish-specialistëve të Bashkisë së Durrësit.
Hetimi për Dakon nisi pas një kallëzimi të bërë nga banorët e pallatit në afërsi të stadiumit të Durrësit, i cili u dëmtua nga tërmeti.
Dako e kishte dhënë para 12 vitesh lejen për ndërtimin e këtij pallati.
Bëhet me dije se SPAK ka lëshuar 7 urdhër-arreste me burg dhe 3 “arrest shtëpie”.
Dako arrestohet me kerkes te SPAK nga prokurori Sotir Kllapi. Mbi të rëndojnë dy akuza, legalizim i objektit përmes lejes së ndërtimit dhe një tender prej disa mijëra euro në bashki, bëhet fjalë për një tender ekspertize prej 22 milionë lekësh për konsulencë duke rritur vlerën gati 10 herë. a.b
