Silva Bino, shefja e Departamentit të Epidemiologjisë pranë ISHP-së, ishte sot në një senacë pyetjesh në SPAK.
Bino dëshmoi për gati 1 orë para prokurorëve të SPAK në lidhje me një tender të ISHP-së, në cilësinë e personit që ka dijeni pasi ka qenë dhe drejtoreshë e këtij institucioni gjatë periudhës së pandemisë.
Ajo nuk pranoi të fliste për mediat, duke thënë; “a jeni në vete?!”, pas pyetjes për tenderat që po hetohen nga SPAK në ministrinë e Shëndetësisë.
Burime shumë të sigurta të gazetares së Top Channel, Anila Hoxha thanë se ajo është thirrur për të dëshmuar në lidhje me hetimet për një tender pranë Ministrisë së Shëndetësisë, ndërsa nuk dihet nëse është rasti i arrestimit të dy zyrtareve.
Burime të sigurta thonë se SPAK ka hapur disa dosje që i takojnë Ministrisë së Shëndetësisë jo vetëm për tendera të njohur, por bëhet me dije jo zyrtarisht se po verifikohet edhe çështja e një tenderimi për vaksinat e gjithashtu edhe disa tendera të akuzuar nga nga politika. Edhe KLSH ka referuar pranë SPAK çështje në të cilat nga auditimi janë gjetur dhe konstatuar dëme ekonomike në dëm të shtetit shqiptar. Por të gjitha mbahen sekret për shkak të verifikimeve që po kryhen jo vetëm nga tre prokurorët e posaçëm, por edhe nga agjentët e BKH-së. a.b
