Prokuroria e Krujës ashtu sikundër kishte paralajmëruar, ka apeluar vendimin e Gjykatës së Krujës për lirimin nga burgu të anëtarit të Bandës së Durrësit, Endrit Dokle
Prokuroria e Krujës ka depozituar apelimin, në sekretarinë e gjykatës dhe për këtë çështje është njoftuar dhe zyra e Prokurorit të Përgjithshëm. Ndërkohë që pritet që në vijim Prokuroria e Përgjithshme të mbajë një qëndrim në lidhje me këtë çështje.
Vendimi për lirimin nga burgut të Endrit Dokles, u dha nga gjyqtarja e gjykatës së Krujës, Enkelejda Hoxha që i hoqi dënimin përjetë dhe e nxori në shërbim prove.
Gjykata e Krujës fillimisht i ka konvertuar burgun përjetë në burg me 25 vite burg për sjellje të mirë dhe më pas ka urdhëruar lirimin e tij, me arsyetimin se ka kryer tre të katërtën e dënimit, po me arsyetimin për sjellje të mirë.
Prokuroria theksoi se vendimi nuk shpërfill vetëm dënimin me burg përjetë për të, por edhe një dënim që i Endrit Dokle e ka marrë në vitin 2013 me 16 vite burg për drejtimin e një organizate kriminale nga qelia ku vuante burgun përjetë.
Endrit Dokle kishte krijuar emrin si një prej anëtarëve më të dhunshëm dhe më të rrezikshëm të Bandës së Durrësit. Të gjitha krimet e tij u zbuluan gjatë procesit gjyqësor nga Adriatik Coli, i penduari i kësaj bande dhe një person i paguar për të vrarë armiqtë e bandës famëkeqe të Durrësit.
/DRONI.al/
