Më 2 shtator të vitit 2014, Policia e Tiranës njoftoi se filiali i një banke të nivelit të dytë ishte vjedhur në periudha të ndryshme kohore nga një prej punonjësve.
Bëhej fjalë për një filial që ndodhej pranë Kopshtit Botanik, te zona e Liqenit Artificial. Burime zyrtare të Policisë së Tiranës thanë se nga verifikimet e vetë bankës rezultoi të ishin vjedhur afro 100 mijë euro. Kjo ishte shuma totale e tërhequr nga arka dhe ATM e bankës, në euro, dollarë e lekë, nga arkëtari Besmir Laja, i cili nuk u arrit të gjendej nga Policia dhe u shpall në kërkim.
Ndërsa Policia arrestoi punonjësen e kësaj banke, shtetasen me iniciale B.D., e cila më pas u shpall e pafajshme dhe u lirua, si dhe filloi procedimi penal për drejtorin F.Z., që po ashtu u shpall i pafajshëm. Në atë kohë ata akuzoheshin për shpërdorim detyre, pasi me mosveprimet e tyre dyshoheshin se kishin lejuar arkëtarin e bankës që të vjedhë para nga arka dhe ATM, në periudha të ndryshme kohore. Ndërsa vetë punonjësi që ka kryer vjedhjen e shumave të konsiderueshme të parave, Besmir Laja, në atë kohë 29 vjeç, nuk ishte gjetur në banesë dhe për këtë arsye u bë shpallja e tij në kërkim policor. Burime nga Antikrimi Ekonomik i Tiranës shpreheshin 4 vjet më parë se ngjarja ishte zbuluar nga auditi i brendshëm i bankës, që kishte konstatuar mospërputhje të parave në procesverbalet e deklaruara në filialin qendror, me atë që tregonte gjendjen e parave në bankë dhe ATM.
Pasi ishin verifikuar kamerat e sigurisë së brendshme dhe të jashtme të bankës, ishte zbuluar se kush ishte përgjegjësi i vjedhjes. Laja u hetua dhe u gjykua në mungesë për veprën penale të vjedhjes përmes shpërdorimit të detyrës. Policia njoftonte zyrtarisht se nga hetimet e kryera, shtetasi Besmir Laja dyshohej se kishte vjedhur në këtë bankë, në kohë të ndryshme shumat e parave përkatësisht, 7 280 012 lekë, 32 900 euro dhe 18 080 dollarë amerikan.
Këto shuma parash, ai i kishte tërhequr nga arka e bankës, ndërsa kishte vjedhur edhe shumën prej 510 000 lekë nga depozita e bankomatit. Gjithsej, duke kryer konvertimin e valutës në lekë, rezultonte që arkëtari Laja kishte vjedhur 13 694 012 lekë nga arka dhe duke i shtuar edhe vlerat e vjedhur nga ATM, shuma shkonte në 14 204 012 lekë të rinj.
