Masakrimi në burgun e Marsejës dhe më pas vdekja pas heqjes së aparaturave nga mjekët në spital për Florenc Beqirin, ka tronditur çdo shqiptar. Ndërkohë që shteti heshti, duket se opinioni publik nuk do ta bëjë një gjë të tillë, pasi të dielën në orën 12:00, te Piramida do të zhvillohet një homazh dhe protestë për të riun shkodran. Thirrja është shpërndarë nga Nisma# në rrjetet sociale. “Boll me qarje në FB! Boll me blegërima në mitingje. Të dielën takohemi te Piramida, per të përcjellë siç duhet Florencin dhe për të mos heshtur!”, thuhet në shënimin e shkurtër.
Homazh-Protestë, të dielën, ora 12:00, Piramida.
Florenci ishte njëri nga ne. I rritur me vuajtje nga prindër të palodhur shqiptarë guxoi të ikë nga Shqipëria për një jetë më të mirë. Iku sepse kërkonte më shumë për veten. Iku sepse ky vend nuk kishte mundësi për të. Iku sepse dashuronte jetën por gjeti vdekjen. E lanë 28 ditë në paraburgim sepse nuk kishte me vete dokumentin. E therrën si të ishte bagëti dhe e lanë në dyert e spitalit si plaçkë pa zot. E vranë duke ia hequr tubat pa pyetur askënd.
Shteti heshti. Heshti kur ai lindi, heshti kur ai u rrit e kërkonte një mundësi, heshti kur ai donte një punë, heshti kur ai u arrestua padrejtësisht, heshti kur e masakruan, heshti edhe kur e vranë. Shteti heshti!Por ne nuk do heshtim!!! Të dielën në 12:00 merr një qiri, një lule, një parrullë, një shok a shoqe me vete dhe eja te Piramida. Boll me qarje në FB! Boll me blegërima në mitingje. Të dielën takohemi te Piramida, për të përcjellë siç duhet Florencin dhe për të mos heshtur!
