Policia e Tiranës konfirmon grabitjen e një banese në Tiranë. Por sipas Policisë, shtëpia e grabitur i përket Damian Gjiknurit dhe jo ministrit të Infrastrukturës dhe Energjisë.
Ngjarja ka ndodhur dy net më parë, ndërsa banesa e Liri Gjiknurit ndodhet në rrugën “Maliq Muça” pranë Komisariatit Nr. 3 në kryeqytet.
Autorët mësohet se kanë qenë tre, dy kanë grabitur banesën me thyerje dhe i treti i priste poshtë pallatit.
Autorët kanë studiuar lëvizjet, pasi në momentin e grabitjes në banesë nuk ka qenë asnjë person, ndërsa pas konstatimit nëna e ministrit Gjiknuri ka bërë kallëzimin në polici.
Grupi hetimor ka marrë edhe deklarimet e nënës së ministrit Liri Gjiknurit 67-vjeçe për ngjarjen duke nisur hetimet.
Autorët kanë marrë disa sende personale dhe një shumë parash, ndërsa policia ka sekuestruar pamjet filmike të bizneseve të zonës për të identifikuar dhe arrestuar autorët.
Deri tani policia e Tiranës ka shoqëruar disa persona për ngjarjen, ndërsa vijojnë hetimet.
Njoftimi i Policisë Tiranë
Gjatë natës, në rrugën “Maliq Muça”, persona të paidentifikuar, kanë vjedhur banesën e shtetases L. Gj. 67 vjeçe banuese në Tiranë, ku kanë marrë shumë lekësh. Vijon puna për identifikimin dhe kapjen e autoreve. Materialet u referuan në Prokurorinë e Rrethit Gjyqësor Tiranë. Neni 134 i Kodit Penal.
Reagon nëna e Gjiknurit: Më kanë vjedhur 3 milion lekë të vjetra
Pas ngjarjes së bërë publike, ka reaguar Liri Gjiknuri, nëna e ministrit Damian Gjiknuri.
“Më grabitën 3 milionë lekë të mbledhur nga pensioni”, mësohet të ketë deklaruar ajo në Polici.
