“Nëse një ministër nuk respekton rregullat dhe detyrat që ka skuadra. Detyra e ministrit është të bëjë detyrat që mbulon portofoli i tij dhe jo të bëjë opinion bërësin, apo opinion tjetërsuesin”.
Ky ka qenë shpjegimi që kryeministri Edi Rama dha sot në emisionin “Tonight” të Ilva Tares në TV “Ora News”, për shkarkimin prej tij të ministrit të Drejtësisë Ylli Manjani.
Rama nuk pranoi të komentojë deklaratat e deputetit të LSI-së Vangjel Tavo.
“Deputetë janë të lirë të shprehin opinione për sa kohë nuk kanë një kontratë si anëtarë të kabinetit qeveritar”.
Për koalicionin, kryeministri nuk sheh krisje.
Sipas tij, “koalicioni funksionon si një pikturë e plotë, pavarësisht detajeve”.
Pjesë nga intervista e Kryeministrit Edi Rama
Ka pritshmëri të madhe për këtë intervistë. Të hënën shkarkuat Ministrin e Drejtësisë. Si është e vërteta e shkarkimit?
Nuk mund të ekzistojë një qeveri serioze në botë nëse një Ministër nuk respekton skuadrën, rregullat dhe mbi të gjitha detyrat. Detyra e Ministrit është të bëjë të gjithë detyrat që mbulon portofoli i tij dhe jo të bëjë opinion-bërësin, opinion-dhënësin apo opinion-tjetërsuesin e qeverisë. Nuk ka asnjë problem ta bëjë këtë jashtë radhëve të kabinetit qeveritar.
E ka të ndaluar të flasë një Kryeministër?
Qeveria ka një kod etik të miratuar me konsensus që përcakton saktësisht marrëdhëniet e çdo anëtari të kabinetit me kabinetin dhe publikun, Ministri ka detyrimin të flasë me publikun, pro ti shërbejë publikut si anëtar i qeverisë.
Manjani po pengonte reformën në drejtësi?
Zgjedhja e Ministrit të ri do forcojë dhe përmirësojë marrëdhënien e qeverisë me Kuvendin dhe do jetë një nxitje mjaft e nevojshme për të çuar përpara reformën në drejtësi. Me rëndësi është çfarë qeveria prodhon për të mirën publike.
