Edhe pse ironia është gjithnjë efikase në raste debatesh kësaj here ajo ka qenë me tepër se kaq në gojën e gazetarit Ilir Kadia, ish-reporter i BBC në Tiranë për 15 vjet.
“Që prej verës të 1999 më shumë kam shkuar në Kosovë sesa në Devoll! Edhe pse me kombësi jam devolli! :)”, shkruan ai duke goditur të gjithë ata që ushqejnë debatin në dy kryeqytetet shqiptare me tezën e kombit kosovar.
Prej disa ditësh një numër gazetarësh dhe politikanësh janë përfshirë në debate lidhur me gjendjen “civitas” të shqiptarëve në dy shtetet e tyre. Debati ndoqi një vizitë të Kryeministrit Rama në Serbi në të cilën tejkaloi në disa raste etikën në raport me Koosvën. Vizita e Ramës u kritikua si një axhendë diplomatike që favorizon Kryeministrin Vucic dhe beogradin më shumë se sa i ndihmon cështjes shqiptare në rajon, ndërkohë që një marrëveshje e njëanshme shqiptaro-serbe për rrugën Nish-Prishtinë-Durrës e ndezi edhe më shumë inatin e Prishtinës me Kryeministrin e Shqipërisë.
Njerëz të medias këtej dhe andej kufirit u kujdesën që ta shtrijnë debatin politik në një terren social e shpirtëror duke inkurajuar nervozizëm me dëm serioz në marrëdhëniet mes shqiptarëve në rajon.
Të parët ishin idhtarët e kombit kosovar në Prishtinë që u ndoqën më pas nga debate gjysëm të kualifikuara apo diletante në Tiranë për shkka të njohjes sipërfaqësore që kanë për Kosovën.
