Ëndrra amerikane te shqiptarët duket se sa vjen dhe bëhet më e fortë, krahasuar kjo edhe me një vit më parë. Të shumtë janë ata që kanë rendur në kancelari ose qendra interneti për të kërkuar fatin në lotarinë amerikane menjëherë pasi procesi i aplikimit on-line është rihapur zyrtarisht ditën e martë në orën 18.00.
Kledja dhe Arditi janë dy të rinj të dashuruar që ndajnë të njëjtën ëndërr, ta nisin jetën bashkëshortore në Amerikë, një sakrificë që thonë se e bëjnë për të ardhmen e fëmijëve që planifikojnë të kenë
Të dy janë me arsim të lartë, vajza ka një diplomë për psikologji ndërsa djali është biokimist në profesion madje të dy janë në punë të mira por prapë se prapë duan të emigrojnë pasi ndiejnë pasiguri për të ardhmen.
Si Kledja dhe Arditi ka dhe shumë të rinj të tjerë që nuk kanë humbur kohë por kanë aplikuar në lotarinë amerikane brenda 24 orëve të para nga shtëpia, puna ose pranë subjekteve që e ofrojnë këtë shërbim kundrejt një pagese të vogël. Dritani është pronar i një kancelarie pranë zonës së bërrylit në Tiranë ku vetëm në ditën e parë janë realizuar 18 aplikime.
Një nga arsyet se përse të gjithë duan të aplikojnë të parët është frika se mos përsëritet defekti i një viti më parë kur serveri qendror në SHBA u bllokua në fund si shkak i fluksit të lartë të aplikantëve.
Por për tu bërë pjesë e kësaj aventure që u ndrit më fatlumëve çdo aplikant duhet të dijë paraprakisht se çfarë dokumentesh kërkohen gjatë plotësimit të formularit elektronik.
Regjistrimi elektronik për lotarinë 2017 startoi ditën e martë më 4 tetor 2016 në orën 18:00 dhe do të mbyllet më 7 nëntor 2016, në të njëjtën orë.
Gjatë 2015 mbi 200 mijë shqiptarë shprehën dëshirën përmes aplikimit online për të patur një të ardhme në Amerikë, një fakt shokues që me shumë gjasë mendohet se do të pësojë rritje pas aplikimeve të reja. /TVNews24/
VIDEO/ Lotaria amerikane, shqiptarët dynden për aplikime, pjesa më e madhe me arsim të lartë
