Ne foto, Genc Merepeza
Drejtori i Policisë Kufitare Genc Merepeza ka shpjeguar rrethanat se pse policia nuk ka reaguar me shpejtësi lidhur me vjedhjen e e miliona eurove në pistën e Rinasit gjatë një interviste në emisionin “45 Minuta” të “Report TV”.
Sipas tij, Policia u njoftua në orën 14:32 minuta, pra 3 minuta pasi mjeti i grabitësve doli nga aeroporti.
Lidhur me akuzat e TIA-s, se policia ishte prezente në pistë dhe nuk veproi, Merepeza tha se në pistë gjendeshin vetëm dy policë, që do të shoqëronin dy të dëbuar nga Vjena.
Ai tha se policët ishin larg dhe nuk kishin fushëpamje.
“Në momentin që kryej grabitja në aeroport po ulej një avion nga Vjena ku gjendeshin dy të dëbuar shqiptarë. Prandaj dy policët ishin aty për të shoqëruar dy të dëbuarit. Por ata ishin larg dhe s’kishin fushëpamje”, tha Merepeza.
“Ne jemi njoftuar me vonesë. Telefonata për grabitjen është bërë 3 minuta pasi makina kishte dalë nga aeroporti dhe ne e gjetëm shumë pranë dhe të djegur. Pra autorët kanë dalë dhe kanë patur kohë edhe të djegin mjetin”, tregon ai.
