Rreth 150 të burgosur të burgut të sigurisë së larte në Drenovë, kanë hyrë në një grevë urie pa afat. Të burgosurit i thane ABC News gjatë një komunikimi me telefon, se prej mbrëmjes së djeshme, një grup prej 150 të burgosurish kanë refuzuar ushqimin duke hyrë në grevë urie. Të burgosurit i kanë paraqitur administratës së burgut dhe ministrit të Drejtësisë një peticion me 6 pika, nëpërmjet të cilave kërkohet ndryshimi i disa neneve të Kodit Penal.
Kërkesat e të burgosurve lidhen me ndryshimin e nenit 64 të Kodit Penal, për zbutjen e kritereve që parandalojnë dhënien e lirimit me kusht.
Sipas vlerësimit të grevistëve, të dënuarit që përfitojnë leje shpërblyese duhet të jenë automatikisht, objekt i përfitimit.
Midis të tjerash të burgosurit kërkojnë zbatimin e ligjit për dhënie amnistie për të dënuarit që u ka mbetur një vit burg pa shlyer, dhënien e lejes shpërblyese për të burgosurit që kane kryer gjysmën e dënimit, pavarësisht dënimit që kanë marrë.
Të burgosurit e Drenovës, kërkojnë gjithashtu edhe përshpejtimin e reformës në drejtësi, pasi ata konsiderojnë se janë viktima të një sistemi gjyqësor të korruptuar.
Grupit i janë bashkuar edhe 15 të burgosurit që janë dënuar për armëmbajtje pa leje dhe që e filluan grevën e urisë javën e kaluar.
Të burgosurit që kanë hyrë në grevë urie i konfirmuan ABC News, se prej mbrëmjes së djeshme administrata e burgut të Drenovës po ushtron presion për të ndërprerë grevën e urisë.
KËRKESAT/ Burgu i Drenovës, 150 të dënuar hynë në grevë urie
