Edi Rama dhe Ilir Meta po frekuentojnë kohët e fundit disa emisione që nuk janë të lidhura drejtëpërsëdrejti me politikën apo debatin për problematika të rëndësishme te vendit.
Sonte Ilir Meta është i ftuar në “Zonë e Lirë” të Arjan Canit ndërsa Edi Rama në emisionin humoristik “6 ditë pa Ermalin”.
Nëse emisioni i Canit ka një fashë të komentit politik ky tjetri nuk ka lidhje me këtë sektor.
Megjithatë arsyet se pse Rama dhe Meta kanë ndërruar modelin e komunikimit në televizion vjen për disa arsye të tjera:
-Ata e dinë se aksionet e qeverisë kanë rënë dhe të njëjtat mjete për të mbrojtur ato po ashtu janë konsumuar. Emisione si Debat i Fevziut apo Top Story i Ballës kanë pjesën e tyre të promovimit politik por nuk kanë të njëjtën audiencë si emisionet e Canit dhe Mamaqit që janë të krahasueshme me audiencën e “Koha për t’u zgjuar” të Bashkim Hoxhës ku Ilir Meta ishte i ftuar para një jave.
-Vetë drejtuesit e emisioneve u është dashur herë pas here të miratojnë vija politike që më pas kanë cuar në dështime. Pavarësisht se gazetarët nuk vendosin për cfarë bëjnë politikanët, perceptimi i qytetarëve është se edhe gazetarët bëjnë lojën e politikës.
-Rama dhe Meta po kërkojnë vëmëndjen e qytetarëve me forma të reja në mungesë të aprovimit për politikat e tyre ekonomike dhe të zhvillimit.
-Analistët e përfshirë në emisionet kryesore politike kanë shënuar rënie të madhe besimi sidomos pas zgjedhjeve të vitit 2013. Debati i politikanëve me ta nuk sjell vëmëndje qytetare. Komentet në rrjetet sociale pas debateve të tilla janë njësoj të ashpra si për politikanët ashtu edhe për analistët.
