Jozefina Topalli deputete e PD-së i ka kërkuar kryeministrit Rama të çojë vendin në zgjedhje të parakohshme pasi nuk ka më votat për të mbajtur qeverinë në këmbë. Ajo theksoi se në sallën e kuvendit mungonin deputetet dhe ministrat e LSI përfshirë edhe kreun e Kuvendit, Ilir Meta.
Në momentin që po fliste kreu i Qeverisë asnjë prej përfaqësuesve të LSI-së nuk ishte në sallë. I pari që u fut në Kuvend, por pasi Rama mbaroi fjalën ishte deputeti Përparim Spahiu.
“Zoti Rama je në vitin e tretë të qeverisjes, por stërzgjatja e tij që s’ka asnjë lidhje me Parlamentin ngjason me një të folur në kabare, sot kryetari i Parlamentit, ministrat e LSI e kanë bojkotuar qeverinë e një milion shuplakave, sot qeveria ka rënë. Ky është thelbi i zgjatjes në sulme, mashtrime, kërcënime që i bën opozitës. Kur s’ke më vota, është mirë të shkohet në zgjedhje të parakohshme”, deklaroi Topalli. Por kreu i Qeverisë e hodhi poshtë mundësinë e zgjedhjeve të parakohshme duke thënë se PD kërkoi një referendum në zgjedhjet lokale dhe e humbi atë.
