Një qen i ekzekutuar me varje, në një nga zonat më të bukura bregdetare në Zvërnec të Vlorës, paraqitet nga një foto e publikuar tek Balkanweb.
Nuk dihen shkaqet e dhunimit të qenit dhe as personat që e kanë kryer këtë akt sadist megjithatë qeni i pajetë vijon të qëndrojë i varur në pemë prej ditësh.
Balkanweb bën me dije se, qeni është varur në një kohë që plazhi ka qenë i populluar nga plazhistë dhe turistë, ndërkohë që askush nuk e ka marrë përsipër ta heqë për të mos i kthyer në makth ditët kur njerëzit vendosin të pushojnë.
Veprimi është dënuar ashpër në rrjetet sociale, ku sipas njerëzve jo vetëm që është një masakër por dhe një rrezik për përhapjen e sëmundjeve për njerëzit që frekuentojnë plazhin në këtë zonë. Asnjë institucion nuk ka ndërhyrë për groposjen apo heqjen e kafshës që aty.
Vetë gazetari i bw e ka denoncuar rastin edhe në profilin e tij në Facebook, ku duke shpërndarë foton e rëndë shkruan: “Sot në plazhin e Zvërnecit, qeni i varur prej disa ditësh në mes të plazhistëve. Për mua ky është krim dhe shkaktarët duhet të arrestohen! Më e keqja është që policia pyjore kalon pranë dhe nuk e merr mundimin ta heqë”.
