Qëndrimet e dyfishta të policisë italiane shfaqur dje gjatë një interviste të shefit të interforcës italiane në Shqipëri Michele Grillo, hedhin hije dyshimi nëse segmente të policisë italiane apo diplomatë të këtij vendi kanë ndikuar nëpërmjet deklaratave të tyre debatin politik në Shqipëri. Si rrjedhim kanë lehtësuar pozicionin e ministrit të Brendshëm shqiptar për të cilin opozita kishte kërkuar dorëheqjen një ditë para zbulimit të avionit tjetër të drogës nga policia italiane.
Policia italiane nuk e ka vënë në dyshim atë cfarë është deklaruar në deklaratën e saj në mëngjesin e 7 shtatorit deri një ditë më parë kur oficeri italian në Shqipëri dha një intevistë tek Top Channel, në kulmin e debatit politik në vend.
Po ashtu mediat italiane kanë pasur për referencë të njëjtën deklaratë që ka ripublikuar mbrëmë shefi i opozitës, Lulzim Basha dhe jo ndonjë deklaratë tjetër të përmendur nga ministri Tahiri dhe aq më pak ndonjë pjesë interviste të shefit të antiforcës italiane.
Fakti që Basha e ripublikon këtë deklaratë do të thotë se në Itali nuk ka ndryshuar gjë, por këtu në Shqipëri.
Ministri i Brendshëm, Saimir Tahiri ishte në një pozitë të vështirë politike dy ditë më parë pas publikimit të intervistës së një ish-oficeri të antidrogës që e akuzonte atë për lidhje me trafikantët e drogës në jug të vendit. Kapja e avionit të drogës në Itali e rëndoi edhe më shumë situatën e tij dhe gjatë seancës parlamentare deputetët e opozitës nuk e lanë të fliste. Kryetari i Kuvendit Ilir Meta bëri pushim dy herë për të qetësuar situatën.
