Edi Rama me një kupon tatimor në dorë
Kryeministri Edi Rama, me tre ministra, dhe drejtoreshën e Tatimeve, ka shkuar sot në Lezhë për inspektim të (mos)informalitetit. Pas Tiranës dhe Vlorës, Lezha është qyteti i tretë që kreu i qeverisë “sheh me sytë” e tij se sa mirë ultimatumi i tij po gjen zbatim.
Por, inspektimi i Ramës duket që është më tepër se një falsitet…
Në qendrat e mëdha urbane askush nuk do të guxojë ti servirë një kafe kryeministrit, pa i dhënë edhe kuponin tatimor. Mbërritja e tij në Vlorë a në Lezhë, nuk është e vështirë të mësohet, ende pa u nisur ai nga Tirana. Aq më tepër kur lokale apo markete, biznese që ka zgjedhur të vizitojë Rama, në zonat urbane, i kanë pasur kasat fiskale, pavarësisht se jepnin apo jo faturë. Ndaj nuk përbën asnjë problem për pronarët e këtyre lloj biznesesh ti lëshojnë edhe një kupon kryeministrit.
Problemi mbetet te zonat rurale, të njohura ndryshe si fshatrat.
Është e vështirë për t’ia rrokur mendja ndokujt, se një dyqan apo lokal fshati, qoftë edhe në rrethinat e bashkisë së madhe të Tiranës, të themi në Shëngjergj, të jetë pajisur edhe pas zhurmanjës më të fundit me kasë fiskale, apo…, apo…, të lëshojë një kupon tatimor.
Çdo të ndodhte në se Edi Rama do të shkonte për një kafe në Shëngjergj dhe kamerieri i mundshëm i lokalit, i cili, zakonisht është edhe pronari, të mos i jepte kuponin tatimor, jo pse nuk do, apo shpërfill ultimatumin e kryeministrit…, por sepse nuk ka dëgjuar ende për këtë “operacion qeveritar” më të fundit, apo se për një arsye apo një tjetër nuk ka mundur ende të pajiset me kasën fiskale…?!
Çdo të bëjë qytetari Edi Rama, në një situatë të tillë, të mundshme, të supozuar…?!
Mos do të ikë pa paguar…, pse nuk u pajis me kupon tatimor dhe pse kështu e ka porositur kryeministri Edi Rama…?!
